Joh 19 | WSK | STEP | Buta se Pilate Jesus tam ilak kasu naguram ale balam se kager kari Jesus taman ale lilumaman.

John 19

Pilate Jesus tam kangono te tagimonko balam

1 Buta se Pilate Jesus tam ilak kasu naguram ale balam se kager kari Jesus taman ale lilumaman. 2 Ale mayang kore ago mu lapik ko kereman ale supuling tuguman. Ale guang diriyam mu tugu tuman, ale kote taikasan, 3 ale balukasan, “Tumongola yawara, Juda nunga king,” makasan, ale kol koma motam te moakasan.

4 Se Pilate akingtala watingi aratam kariimet motam biya mu nunga maonam, “Ani ilak nenengate aratasam mu nina te ikial ani noko memek bo me arigem.” 5 Asele Jesus tai watingi aratam, guang diriyam tugu tuman se mayang kore ago lapik ko nungurman mu supuling te aniram se ago aratam. Se Pilate balam, “Kari imi arigalko,” mam.

6 Se priest bibiya se temple bitua ko kari nuna aringiman ale aiman balukasan, “Moralko!” makasan, “tam kangono te tagiralko,” makasan.

Bare Pilate nunga maonam, “Buta mu nina nengeta tal ale tam kangono te tagiralko. Ani memek bo nu te morik se kuerukko me arigem.”

7 Bare Juda alo sail tagiman balman, “Anananga munan den bo karogo, mu iwita balso, kari imi am kuerukko, mu awuk, nu numi balam Kaem ko Namar mam. Buta se am kuerukko.” ^{▼▼John 19:7 Nononga ikia te Jesus munan den bo kiaram: Leviticus 24:16; John 5:18.}

8 Se Pilate den mu ikiam ale nu ninguru nguangakaso. 9 Nu peleram kawam ningi kasu naguram ale Jesus isuam, “Ni aparete tairem a?” Bare Jesus noko isa koma me balam. 10 Se Pilate nu maonam, “Awuk se ni ani agarak me munakasam a? Ni me ikisam, ani balik se ni am namarko, se ani balik se tam kangono te ka tagimon se kuarko, bare ni me ko ikisam e?”

11 Se Jesus balam, “Bare Kaem ni sokel me kisok, mu ni ani angimik te mel bitarko me terong. ^{▼▼John 19:11 Kaem baluk mu asele mel aratukko: Acts 2:23.} Buta se kari ni kiting te aga beteram, mu noko ikup memek mu biyala, nika ikup memek kiaram.”

12 Se Pilate den mu ikiam ale nu lage Jesus te bitiruk se am pelerukko wore ko loagakaso. Bare Juda alo balukasan, “Ni kari sumu bitar se yam namuruk, mu ni Caesar ko bo mena. Kari kota numi balso king ko balso, mu nu Caesar kiarukko kaeso.”

13 Se Pilate den mu ikiam ale Jesus ilak watingi aratam, ale kuwim te daiga ale den ariga ko mu te daigam. Kuwim mu manga peng peng te muruman, ko nup Hebrew den te mu Gabbatha. 14 Tom mu Passover ko mel te nunga ko tom. Worem tai dirmam. Se Pilate Juda alo nunga maonam, “Nenenga king arigalko,” mam.

15 Bare nuna aikasan, “Moralko! Moralko! Tam kangono te tagiralko!”

Se Pilate nunga isuam, “Mu nenenga king ZZZ wore / bare nina balsan ani tam kangono te tagirikko e?”

Se priest bibiya noko den koma balman, “Ana nangimik king bo iru mena, Caesar kota suwanta anananga king.”

16 Se Pilate Jesus Juda alo nuguting te beteram, tam kangono te tagimonko.

17

Jesus tam kangono te tagiman

(Mat 27:32-44; Mark 15:21-32; Luke 23:26-43)

Buta se kager kari Jesus taman ilak namaman.Nu kota ko tam kangono te tagimonko mu tuman se giam, se wonong biya Jerusalem beteman ale ilak sor ko nup Supuling Sokel mu te namaman, sor mu Hebrew den te Golgotha masan.

18 Kuwim mu te tagi gilingiman, ale kari ilagala ago nu ilak nunga tagiman, nuna noko beta sing sang se Jesus kusumuri. 19 Pilate balam se den bo batagorman ale Jesus supuling ko tam kangono te tagiman. Den mu iwita balam: “JESUS NAZARETH KARI, JUDA NUNGA KING.”

20 Juda kariimet suen biya nama tai se den mu kaukasan, mu awuk, kuwim nuna Jesus te tagiman mu wonong biya ko pingita. Den mu Hebrew den, Rome nunga den, se Greek den buta te batagorman. 21 Se Juda nunga priest bibiya Pilate manorman, “Ni nu Juda nunga king ma suwuta me bataguruko! Ni iwita bataguruko, ‘Kari imi numi balso nu Juda nunga king maso,’ iwita bataguruko.” 22 Bare Pilate balam, “Den ani batagem mu ta ani batagem,” ma balam.

23 Kager kari ilagala ilagala Jesus ilak nama tam kangono te tagiman mu ko guang giman ale pagaru nunumi tuman. Ale ko guang bo ago taman, bare guang umu biling biling giman ale me biriman, am suwanta lilim nungurman, yawarakala. 24 Se taman ale nunumi manorman, “Imi me barukunakko,” maman. “Ana ko kolanak ale kari awiriya taukko mu aringinakko.” Ale nuna uwuta beteman se batoga bo iwita balam mu ko nunguning kaparam:

“Nuna aninga guang sang pagaru nunumi tuman,
ale suwanta bare awiriya taukko wore ko kolakasan.”
Den uwutata aniram se kager kari uwutata te beteman. ^{▼▼John 19:24 Psalm 22:18.}

25 Jesus ko tam kangono duap te imet sanamiwakasan mu Jesus ko nuam Maria mu se, Maria ko uria mu se, Maria bo Clopas ko nuwus mu se, Maria bo tala Magdala wonong ko imet butata sanamiwakasan. 26 Se Jesus ko nuam se olekem nu ko kuakaso mu ilak ZZZ sanamiwaman se nungarkam ale ko nuam maonam, “Imet, sumu nika kuriang,” mam. 27 Ale olekem mu maonam, “Sumu nika niam,” mam. Se tom umu te olekem mu Maria tam ilak ko kawam te namaram ale ko sinar to se ilak lagakaso.

Jesus kueram

(Mat 27:45-56; Mark 15:33-41; Luke 23:44-49)

28 Tom mu menaram se Jesus ikiam noko ura bita kutuwuram. Buta se Kaem ko batoga te nunguning aratukko nu balam, “Ani yu ko kuerem,” mam. ^{▼▼John 19:28-29 Psalm 22:15; 69:21.} 29 Se yu kuting bo anikaso mu waen aora ago anikaso. Se nuna mel bo taman ale waen mu ningi mituwuman, ale tam hyssop ko miri bo kopa te atumuman ale Jesus ko kore sumulak te beteman. 30 Se misikiram ale balam, “Mel bita kutuwurem,” ale dogotak gorekam eng kueram.

Kager kari Jesus beta te gaongam

31 Tom Jesus kueram mu Passover ko mel te nunga ko tom. Sabbath mu aratukko mu tom biya nunguningkiri, se Juda alo nononga nongomang kari nunga moman mu nononga nungumik guang Sabbath tom te me tam kangono te keka sagurukko. ^{▼▼John 19:31 Deuteronomy 21:22-23.} Butata se namaman Pilate manorman, nu baluk se kager kari namomon kari me kueman owore nusuwik kulukumumon se tairate kuemon se nungumik guang kututuwu gimon ago kapomonko. Se Pilate aing mam. 32 Se kager kari namaman kari ilagala Jesus beta sing sang nunga tagiman mu bo suwik kulukumuman, aking nama komasang te mu suwik kulukumuman. 33 Bare tai Jesus kote, mu nu maingkala kueram mu aringiman ale noko suwik me kulukumuman.

34 Bare kager kari bo Jesus beta te gaongam se tairate kumik gue se yu ago kaparam. 35 (Kari mel mu arigam mu nu kota ko motam te arigam nunguningta, ale ko ninga manarso, nina agotala noko ko nengemang ningi nunguning arukko.) 36 Mel uwutata aratam se Kaem ko batoga aniram mu nunguning kaparam. Den mu iwita balam, “Nuna kumik sokel bo me kulukumumonko.” ^{▼▼John 19:36-37 Numbers 9:12; Psa 34:20; Zechariah 12:10; Rev 1:7.} 37 Se Kaem ko batoga bo tala iwita balam, “Nuna kari gangorman mu aringimonkowo.”

Nuna Jesus ko kumik guang mutim tuguman

(Mat 27:57-61; Mark 15:42-47; Luke 23:50-56)

38 Asele udagi te Joseph, Arimathea kari, nu Jesus ko kumik guang taukko se Pilate isuam. Joseph mu Jesus ko olekem bo tala, bare nu Juda nunga kari bibiya nunga nguangaram ale gomang ningi nunguning kaluwuram. Pilate aing mam se Joseph namaram Jesus ko kumik guang tam. 39 Nicodemus, ulengkala nu Jesus arigokko turom kote namaram, mu nu Joseph ilak namaram. ^{▼▼John 19:39 Nicodemus: John 3:1-2.} Nu tam ilagala nunga kiri ko siring yawara giman guruguman mu giam karogo namaram. Tam kiri mu ko ikup 30 kilogram iwita.

40 Se nuna ilagala Jesus ko kumik guang taman, ale guang biling maiya maiya mu te mel siring yawara mu karogo biguwu biguwu kaloman. Mu nuna Juda nunga kari mutim tuguma wore te beteman. 41 Se kuwim Jesus tam kangono te tagiman mu duap te mu ali bo tam ago, se mutim bo manga ningi nunguru beteman se aniram. Mu ulengkala kari bo te me beteman, yam aniram. Se nuna Jesus ningi beteman. Mu awuk, mu pingi anira, se tom mu Juda nunga Sabbath mel nunga ko tom. ^{▼▼John 19:42 Mu Friday, se worem nama kapuruk mu Sabbath tom duap bitirukko, ura te me betera ko se.}

42